Lífrænt vottaðir aðilar

Hér að ofan er að finna skrá um þá sem höfðu vottun í árslok 2024 til framleiðslu og viðskipta með lífræna framleiðslu, svo og fyrirtæki sem voru vottuð til framleiðslu náttúrulegra aðfanga.

Í upphafi árs 2023 tóku gildi nýjar reglugerðir Evrópusambandsins hér á landi um lífræna vottun matvæla og fóðurs. Mikil vinna hefur verið unnin af hendi við nauðsynlegar uppfærslur kerfa hér sem víðar í álfunni. Vegna uppfærðrar flokkunar þótti nauðsynlegt að taka mið af því við upplýsingagjöf um vottun innan landsteinanna. Flokkunin er í samræmi við skilgreiningar sem koma fram á þeim vottorðum sem gefin eru út á kerfi ESB, Traces NT, sem heldur utan um matvælaskjöl innan evrópska markaðarins. Flokkarnir eru: Framleiðsla (öll frumframleiðsla, þ.e. landbúnaður, fiskeldi og söfnun land- og lagarjurta), vinnsla (öll umbreyting, pökkun og merking vöru), geymsla, dreifing & markaðssetning, innflutningur frá löndum utan ESB/EES og útflutningur til landa utan ESB/EES.

Í lok árs 2024 voru 58 lögaðilar á Íslandi með vottun vegna lífrænna matvæla, sáðvöru og fóðurs skv. reglugerðum Evrópusambandsins. Starfsemi þeirra dreifist þannig:

• Frumframleiðsla - 27

• Vinnsla - 22

• Dreifing / markaðssetning - 38

• Geymsla - 38

• Innflutningur - 14

• Útflutningur - 3

Ítarlegri upptalningu er að finna í vottunarskrá sem fæst í gegnum hnappinn að ofan.

Tún vottar einnig lífræna framleiðslu sem er utan ramma reglugerða, svo sem snyrtivörur, svo og framleiðslu aðfanga og náttúruafurða. Þau kerfi styðjast að mestu við kröfur lífrænnar vottunar samkvæmt reglugerðum, en þó með sínum sérákvæðum. Einnig vottar Tún aðila í Færeyjum, sem sinna lífrænni framleiðslu og vinnslu matvæla. Er þar stuðst að öllu leyti við reglugerðir ESB, en vegna stöðu Færeyja er þeim ekki heimilt að nota Evrópulaufið sem er vottunarmerki ESB. Vottunarhafar fá hinsvegar heimild til að nota vottunarmerki Túns um lífræna framleiðslu.

·     Lífrænt utan reglugerða (snyrtivöruframleiðsla) - 3

·     Aðföng og náttúruafurðir (fiskimjöl, kítín og fæðubótarefni) – 7

·     Lífrænt í Færeyjum (landbúnaður og bjórgerð) - 2

Alls hlutu því 70 aðilar vottun Túns á liðnu ári á sviðum framleiðslu lífrænna vara og aðfanga/náttúruafurða, hér á landi og í Færeyjum.